鼠患肆虐，市民苦不堪言，都係當局滅鼠不力所致。食物及衞生局尋日就透露，自五月啟動「全城清潔」行動後，截至十月已捕獲近兩萬隻活鼠，較去年同期多出四成四，堵塞嘅鼠洞亦增四成一。嘩！講到好大成效咁喎，之但係陳肇始咪鬆毛鬆翼，事關老鼠嘅繁殖力好高，而匿喺社區嘅老鼠數目應該唔少，捉到嘅都唔知佔幾多百分比，正所謂一隻老鼠都嫌多，唔該局長再加大力度捉鼠，唔好又再放軟手腳，再爆多次有市民感染大鼠戊肝就弊嘞！
