政情：海外醫生回港執業試難 張宇人叫郭家麒去考吓
本港公立醫院醫生人手不足唔係新鮮事，而海外醫生想嚟香港執業嘅話可以透過有限度註冊形式受聘，仲可以應考醫委會設立嘅執業資格試獲取同本地培訓醫生同等嘅地位。但咁多年嚟，呢個執業資格試都被人批評難度太高，令到好多海外醫生都冇辦法回港執業。立法會議員張宇人尋日喺立法會大會上提問嘅時候，就更加寸本身係專科醫生嘅議員郭家麒都未必可以考到！
全科知識 考起專科醫生
張宇人話好多海外專科醫生喺專科方面擁有豐富知識，反指要考番全科嘅知識對佢哋嚟講好有難度，更加話就算係香港本地嘅專科醫生去考呢個海外醫生回港執業試嘅話，都未必可以考得到。講到「興」起，張宇人更加寸本身係泌尿外科專科醫生嘅郭家麒，叫佢去試吓考呢個試，睇吓佢可唔可以考到？
之後張宇人就問食物及衞生局局長陳肇始，局方會唔會考慮放寬回港執業試嘅條件？陳肇始就話喺一八年十月開始喺網上設立咗教學資源中心，方便一眾準考生溫書同埋熟溫考試模式，仲話希望咁樣可以幫到一眾海外醫生考到好啲成績添！