政情：內會未選出主席 問題搬上大會傾
立法會內務委員會已經開過多次會，但仍然停留選舉主席程序，而呢個情況已經影響到大會，所以尋日就將內會嘅問題搬咗上大會上嘈喇！
陳恒鑌叫拉布議員三思
立法會尋日討論兩條附屬法例係咪延展，議員陳恒鑌坦言，內會未能正常運作，搞到無法案委員會下，所以無辦法下只能支持延展，相信仲有其他附屬法例面對同樣情況，直言陸續有嚟，希望喺內會中就選舉主席進行拉布嘅議員要慎重考慮到大量法案受影響。
之後議員區諾軒反駁，話內會現時咁嘅情況，全因立法會秘書長陳維安缺席，直指佢肯出席就可以解決一切爭議囉，但呢個講法令到議員黃定光（象哥）發火。象哥話內會開咗六次特別會議只為選主席，而自己喺議會十六年都未曾見過選主席要秘書長現身，大彈現時係蹉跎歲月，一拖再拖，搞到一切工作卡喺度，窒息咗議會正常運作囉！