政情：為疑爆粗事件解畫 邵家輝：「點解你」講得太快
有時口快快講錯嘢都唔出奇，但畀人聽咗係講粗口就唔係幾好喇！好似立法會批發及零售界議員邵家輝日前喺一個委員會會議上，對食物及衞生局啲官員選擇性引用數據，嚟游說議員全面禁售加熱煙好唔滿意，佢疑似爆粗鬧啲官，但佢尋日就話自己冇講粗口，而係將「點解你」講得太快，真係冤枉啊大人！
被林卓廷笑一×成名
當日邵家輝疑似爆粗講咗句「×你點解讀啲又唔讀啲嘅呢？」佢尋日解畫，話唔明點解當日係講「點解你」會變咗做「×你」，仲即場案件重演，對住另一議員林卓廷係咁示範。林卓廷又跟住邵一齊讀「點解你」，發現點聽都唔似粗口。林又笑邵「一×成名」，邵就話自己份人好低調o架啫！
連路過嘅會計界議員梁繼昌都幫邵家輝平反啊，話好少聽到邵講粗囗。林卓廷都認同：「輝哥好斯文o架嘛」，話喺公開場合冇聽過邵講粗口，私下呢就唔知喇！