政情：未上任先補鑊 張秀賢請議助工時長捱轟

一星期要返49.5小時

因違法佔領行動案罪成被判二百小時服務令、元朗候任區議員張秀賢，早前喺Facebook貼文招聘議員助理，列明因社會運動而被捕、被起訴或定罪背景不拘，一個禮拜返五日半、一個禮拜工作時數就四十九小時三十分鐘，偶爾需要彈性上班時間。

但點知，社會及政治組織從業員工會尋日就貼文，話有候任區議員以近五十小時作為招聘手段，違反職工盟標準時數四十四小時嘅勞工立場訴求，又指摘有關區議員以高薪作為藉口，仲話有啲人揚言標準工時同實際工時有差距。雖然冇開名，但工會講明「近五十小時」，都明白係講緊張秀賢喇！

喺呢個工會嘅貼文出街後，張秀賢就補鑊，將招聘廣告上嘅工作時數，由四十九小時三十分改成四十小時，遠低於工會講嘅標準時數四十四個鐘。莫非佢知衰，所以縮番啲工作時數？佢喺Fb貼文解釋，話自己一開始將工作時數交代清楚，係希望可以改善風氣，為員工提供合理薪金，扭轉議員助理低薪、工時長、待遇差嘅問題，點都估唔到反而會遭到指摘。

話5個鐘係食飯時間

之後我哋打電話問番張秀賢，點解突然改時數？佢解釋，一開始列明嘅四十九小時三十分，其中有五個鐘係工作日嘅食飯時間，佢只不過寫埋入去，並唔係壓榨員工，只不過想清楚列明所有細節。佢話列明工作時數同薪金，做嘢嘅時候透明度高，竟然被工會鬧，覺得好無辜，仲話個別議員請人嘅時候，冇標明工作時數同員工待遇，覺得更加唔合理。

為咗唔再引起誤會，佢將時數改番四十小時，而超時工作將會有津貼，又呼籲其他人招聘嘅時候，列明職員待遇。佢仲話租辦事處已經好貴，依家仲要請助理，根本經費就唔夠，預咗請人嘅時候要拎份糧補貼！