中環出更：陸頌雄大呻有人對佢好苛刻

被梁君彥兩斥離題

立法會傾緊一條與僱員再培訓相關嘅附屬條例，作為勞工界代表嘅陸頌雄當然大把嘢講，點知就畀立法會主席梁君彥斥離題，提醒話現時只講係咪支持呢條附屬條例延展囉！

之後陸頌雄稍作修正後繼續發言，但幾分鐘後梁君彥又再提醒，話有意見可向相關事務委員會反映，搞到自稱有千言萬語想講嘅陸頌雄有所不滿，大話「我發覺最近你對我好苛刻」，又提及之前有其他議員講到上火星都無被阻止，淨係提佢一個咁話。

陸頌雄之後仲講，佢同梁君彥一個代表勞工、一個代表商界，但唔好因為咁而特別關心佢，否則會搞到佢發言時好大壓力，不過佢仍會頂住壓力喎，而最後陸頌雄又真係頂住壓力完成發言喇！

卓妮