中環出更：食得晒至好嗌 鄭明明身體力行宣揚惜食
臨近聖誕同新年，唔少人都會同朋友聚埋一齊食大餐開心吓，但好多時都會嗌太多嘢食，食唔晒又會造成浪費。齊惜福近日舉行慈善籌款晚宴，有「美容教母」之稱嘅鄭明明都有到場，佢話雖然近呢幾年大家慢慢學習節省食物，情況似乎有些少改善，但都坦言要繼續努力宣傳環保意識，食唔晒真係要打包咁話。
鄭明明話明白大時大節市民都鍾意出街慶祝，好似自己生日，囡囡因為錫住佢，出去都會叫好多嘢食，話食唔晒就打包，最緊要開心！但佢就鍾意適可而止，食幾多叫幾多，唔夠再叫咁話。佢仲提到，中國人文化好鍾意啲餸大大盤，唔似西式一小碟咁，食完一樣再一樣，真係希望大家齊齊有惜食習慣咁話嘞！
黃家和嘆自助餐大嘥
出席晚宴嘅當然仲有齊惜福主席梁祖彬同香港餐飲聯業協會會長黃家和。黃家和覺得自助餐係咁多場所中浪費食物最多嘅地方，唔單止大家有時拎咗啲食物食唔晒，酒店剩低嘅都唔知點處理，造成大量食物浪費，慨嘆真係好大嘥，佢就好少食自助餐喇，食嘢都會刻意提醒自己食幾多叫幾多，同埋唔會食太飽，對身體都好啲咁話，佢話會喺朋友圈中散播惜食習慣o架，等多啲人有咁嘅意識絕對係好事喎。
轉個頭見到仁愛堂前主席羅台秦，佢話細細個媽咪就教佢唔可以浪費任何食物，食唔晒都係會打包，唔少亞洲人可能會覺得唔好意思，但自己以前喺美國讀書，外國人都會咁做，食唔晒打包係美德！而「金錘拍賣官」金鈴就講到細個非常嚮往聖誕大餐，所以依家聖誕節都會同仔女慶祝，食大餐之餘仲會齊齊整薑餅人o架，成家人一起整，小朋友又會喺隔籬幫手裝飾，開心之餘又食幾多整幾多，完全無浪費嘞！
卓妮