政情:區選慘敗收場 梁志祥梁美芬陳恒鑌 交棒變跌棒

今屆區議會選舉結果塵埃落定,受近月社會運動影響,建制派喺今屆區議會選舉慘敗收場,有部分長勝將軍亦遭受牽連,其中貴為雙料議員嘅民建聯梁志祥、陳恒鑌同埋經民聯梁美芬仲直頭交棒失敗,其中有部分仲輸成千票添!今次選舉重創成咁,建制派真係要好好反省喇!

今屆立法會議員當中,有成廿六位雙料議員,其中梁志祥、陳恒鑌、梁美芬、自由黨邵家輝、民主黨胡志偉同埋民主派區諾軒喺今次選舉中決定收山唔玩,交棒畀年輕一代。

今次交棒失敗嘅梁志祥、陳恒鑌同埋梁美芬,分別喺元朗天耀選區、荃灣楊屋道選區、同埋九龍城黃埔東選區做咗超過三屆區議員。不過今屆三位決定退下火線,交棒畀自己嘅黨友司徒駿軒、伍俊瑜同李超宇,但可惜三位都係落敗收場,其中司徒駿軒同李超宇同對手仲要差成過千票添!

另一邊廂,邵家輝、胡志偉同區諾軒就成功交棒,接棒嘅分別係自由黨阮建中、民主黨莫嘉嫻同埋陳欣兒。其中莫嘉嫻過去曾經係九龍城區議員,但喺上屆輸咗議席,最後仲辭任民協黨主席一職,喺前年加入民主黨後仲轉埋區,今次成功重返議會。唔止雙料議員,就連區議員都交到棒,好似現任南區區議員柴文瀚咁,就成功交棒畀黨友嚴駿豪。

父子兵齊齊冇得撈

區議會選舉一向都出現唔少父子兵、兄弟幫同埋夫妻檔,本身係十八鄉鄉事委員會主席嘅梁福元,因為放棄連任而冇咗元朗區議會當然委員嘅資格,但最後又透過補選重返區議會。之不過,佢同囝囝梁明堅分別喺元朗十八鄉西同十八鄉中選區雙雙落敗,齊齊冇得撈。

另外,仲有兩對父子兵交棒,但都雙雙失敗收場,分別係喺灣仔跑馬地選區做咗廿幾年嘅吳錦津,今屆本身想交棒畀囝囝吳澤森,但最終以近百五票之差落敗。另一對父子兵就係沙田錦濤選區嘅陳國強,今屆就由囝囝陳天俊出戰,最終都係落敗而回。

至於兄弟幫方面,大埔區議員區鎮樺成功連任,而佢細佬區鎮濠過去曾喺大埔大元選區出戰,喺今屆仲成功當選,齊齊做區議員。不過,分別喺九龍城黃埔東選區同埋紅磡選區出戰嘅關氏兄弟就冇咁好彩,哥哥關家倫就贏逾千票當選,但弟弟關兆倫就輸二百幾票喇!

最後就仲有夫妻檔,深水埗區議員吳美成功連任,而老公麥偉明轉戰深水埗寶麗選區後亦成功當選做區議員;大埔區議員劉勇威今屆亦成功連任,老婆陳蔚嘉就出戰大埔太和選區,成功擊敗自九十年代起出任區議員嘅鄭俊和。

第一手消息請下載on.cc東網iPhone/iPad/Android/Windows Phone Apps