中環出更：一舊雲又發夢 西九小組泛民雙失
立法會監察西九文化區計劃推行情況聯合小組委員會尋日下晝開會選舉正、副主席，唔知係咪大家喺區議會選舉過後有倦意，明明有十六名議員已加入小組委員會，但會議開波時就只有四、五人，民主派更只得議員黃碧雲（一舊雲）。而正、副主席選舉期間，一舊雲一時就自己和議自己出選，一時就亂咁提名，都唔知係唔熟書，定係未瞓醒，一舊雲真係唔係浪得虛名。
和議自己 又亂提名
話說會議一開波，上個立法年度任小組委員會主席嘅議員林健鋒主持會議，問係咪需要重新選主席，當時勢孤力弱嘅一舊雲仍然堅持要選，之後民主派嘅議員陳淑莊（Tanya）行入會議廳，剛好趕得切提名一舊雲，點知冇人和議，一舊雲就話「我和議」，但議員唔可以自己和議自己，好彩議員陳志全到達會議室，可能連發生乜嘢事都未知嘅佢，就應一舊雲同Tanya要求話要和議喇，不過最後都係由林健鋒當選。
到咗選舉副主席，Tanya再次提名一舊雲，點知一舊雲就提名番Tanya。由於接受咗提名嘅議員係唔可以提名其他人嘅，所以一舊雲提名Tanya當然係無效啦，而最後副主席一職就由建制派議員吳永嘉擊敗一舊雲奪得。正、副主席都被建制派包攬，泛民就雙失嘞！
卓妮