中環出更：與家人嘈交 鍾穎茵閂埋房門喪彈琴
音樂無分界限，亦可以陶冶性情，早兩日卓妮去咗垂誼樂社搞嘅音樂會，仲同幾位愛好音樂人士傾過偈，了解吓音樂對佢哋嘅重要性。
現場見到副總經理鍾穎茵（Wendy），Wendy話細個已經開始學琴，依家有時都會同朋友唱吓卡拉OK，佢話音樂對佢係好重要，可以幫佢抒發情緒，仲話年輕時正值反叛期，有時同家人頂撞兩句，就會走入房閂埋道門，不停喺度喪彈琴，彈到全情投入就會忘記唔開心嘅嘢。
主席羅君本就話無時無刻都會聽音樂，音樂可以牽動佢嘅情緒，例如年輕拍拖嘅時候就鍾意聽情歌，依家人大咗就鍾意聽啲平和舒服嘅音樂，揸車就一定會聽歌，同埋公幹時喺酒店都會聽吓歌放鬆心情，去應付忙碌嘅工作。
李垂音：練到手指變形都無後悔
同場仲有會長李垂音同總經理謝雪端，李垂音話媽媽係鋼琴老師，自己彈鋼琴，細妹拉小提琴，細佬就拉大提琴，形成三重奏，經常出去表演，好開心因為自己努力得到人認同，但自己對音樂都有付出唔少，因為十一歲開始每日要練六個鐘頭彈琴，練到手指變形，但從來冇後悔，因為佢覺得對音樂付出係值得嘅。
謝雪端：成日一路沖涼一路哼歌
謝雪端話細細個都有彈開琴，亦鍾意唱歌，即使依家喺機構做嘢做到悶悶哋，都會同同事攞支唱K神器出嚟一齊唱歌，提升番氣氛繼續工作，仲話自己係「浴室歌后」，有時返到屋企辛勞過後，就會一路沖涼一路哼吓歌，可以將自己完全放鬆減壓。
卓妮