政情：招收外國人子弟 陳淑芝助母校脫險
放眼國際，從來都係港人嘅強項。紫荊青年商會會務顧問陳淑芝，幾年前為中西區一所小學擔任校友會主席，學校就遇上收生不足嘅窘境，幸好喺集思廣益之下，決定招攬居港外國人子弟入學，從而避過殺校危機。
陳淑芝話，佢擔任校友會主席嘅學校，就係佢童年就讀嘅小學，以前曾一度有大批新移民子弟就讀，但後來收生狀況一年差過一年，從而蒙上殺校嘅陰影。有一次學校開會，佢見校內既然有少數族裔學生，建議何不將收生對象，拓展至其他外籍居港人士嘅子女？校方覺得意見唔錯，於是教職員到各國駐港領事館進行推廣，結果唔少居港外國人由此得到資訊，踴躍報名入學或從其他國際學校轉校報讀。
學生多達40國籍
學生嘅國籍繁多，佢話由近至日韓遠至歐美，以及非洲嘅肯尼亞同喀麥隆等四十個國家，學校國際化得頗為徹底之餘，學生人數亦驟增，佢見殺校危機得以解決，亦告功成身退，安心將主席職務交畀另一位校友嘞！