中環出更：柬埔寨國王好靚仔 陳昭昭曾幻想做王后
柬埔寨中國文化友好協會早前舉行聯歡晚會，創會主席、被封為「菲律賓棉蘭老島」公主嘅陳昭昭同老公李志豪當然有到場，卓妮問起昭昭公主喺柬埔寨有乜嘢趣事，佢笑住話柬埔寨國王好靚仔，自己仲曾經幻想過做王后o架！
昭昭公主話喺○三年前後曾經到柬埔寨會見國王西哈莫尼，話對方當時四十幾歲、單身，仲要非常靚仔！自己曾經有一刻幻想可以嫁畀國王做王后，但原來國王係終身不娶o架！事關王太后因為身份問題，唔准許佢同心愛嘅女人結婚，於是就決意終身不娶，將一生奉獻畀柬埔寨，昭昭覺得真係好可惜。
問到柬埔寨近年有乜嘢變化？佢話柬埔寨進步咗好多，以前會見到六、七歲小朋友要喺街邊補車胎，明明係大人嘅工作由小朋友做，真係好無奈，相反依家經濟發展令大家富裕咗，覺得非常開心。
施家殷買子彈殼招麻煩
轉個頭見到九龍樂善堂主席施家殷，佢就話最近去旅行發生咗件驚險事件，就係去日本旅行買咗一盒子彈殼返嚟做手信，點知唔畀入境，唔單止物件被沒收，連人都被扣留咗兩個鐘，好彩最後都只係記錄在案就放行，真係好尷尬嘞！佢提醒大家喺敏感時刻，真係要多加留意，一唔小心就會惹到麻煩咁話。
荃灣扶輪社社長葉志強亦話去旅行都曾經遇到驚險又尷尬嘅事，話說早前同一班朋友去越南爬地洞，愈爬就愈深，跟住就覺得空氣稀薄，呼吸困難，點知喺呢個時候，前面有位團友，竟然突然放屁，當時大家郁又郁唔到，惟有「硬食」，喺唔夠氧嘅情況下咁做，真係唔知笑定喊，可能嗰位團友「受壓」，驚得滯先控制唔到自己呢！
卓妮