政情：跑步曾跌傷面 高永文未驚過
無官一身輕嘅食物及衞生局前局長高永文，雖然卸任多時但仍活躍於各項公開活動。尋日佢應邀出席一項慈善跑活動，但佢並無落場跑，而係只擔任鳴槍嘉賓，莫非四年前佢試過參與跑步活動意外跌傷面額，從而對跑步產生心理陰影？
慈善活動行足4日都得
高永文話並無因上次跌傷，而驚咗跑步，相反好多跑步活動佢都有參加，只不過今次佢另有義工活動，同呢次慈善跑撞咗時間，惟有暫時掛上免戰牌。佢又話每次參與跑步活動都有一個原則，就係頂多跑三公里，因為呢個距離已經係個人能力嘅極限。
雖然再跑多一公里都難以應付，但佢話若果改為步行，就行到好遠都得，例如喺香港行山，就可以日行三十五公里，到內地慈善步行，行足四日都面不改容。不過對於要一口氣完成一百公里嘅毅行者活動，佢就認為自己嘅體能同耐力都不足以應付。