政情：訂工時指引 遲無結果 港府一味拖 議員扯晒火

擱置標時 補飛拖足年半

根據立法會有關嘅數據顯示，雖然喺舊年本港嘅工作時數略為縮減，即每個星期工作四十四點三小時，當中較低技術人員工作時間一般較長，包括工藝、機器操作、服務及銷售人員、保安人員等，每周至少工作四十八小時，甚至六十小時。香港勞工嘅工時較大部分先進地方為長，亦較國際勞工組織建議差得遠，長工時僅次新加坡。

勞工界一直要求就標準工時立法，而政府喺一三年四月成立標準工時委員會，研究有關事宜，但勞資雙方發生爭拗，勞工界嘅代表更反枱，杯葛出席委員會會議，最後委員會喺一七年一月向政府提交報告，但勞工界唔收貨，政府擱置就標準工時立法，最後喺舊年五月話會着力喺二○二○年為指定行業制訂非強制工時指引，供僱主參考，但遲遲未見羅致光有任何行動，仲有個半月就到二○二○年，但依家都見唔到訂立有關指引。

被斥冇諗過保障僱員

潘兆平批評揀呢十一個行業，本身代表性已經唔足夠，仲要指引冇法律約束，效力本身存疑，加上到現時仍然見唔到有關指引，證明政府喺呢方面完全唔積極，冇諗住改善同保障僱員，仲話唔願意做自然做唔到，質疑政府係咪喺度拖延時間。

佢又話勞工界要求每周工作四十四小時、超時補水一點五倍加入指引，但都係應盡快就標準工時立法，先可以根本地解決問題。

老實講，政府唔就標準工時立法，成立咗相關委員會拖拖拉拉幾年都係得個吉，之後話為十一個行業制訂嘅非強制指引亦拖得就拖，咁搞法，打工仔想有標準工時，肯定仲有排等。