中環出更：馬時亨老婆自爆 為睇書同長女鬧交
要培養小朋友嘅閱讀興趣，有時真係要想吓辦法，好似港鐵前主席馬時亨嘅大女馬露明，就選擇出繪本，較為生動有趣，亦令小朋友容易明白故事內容，尋日喺一間書店舉行新書發布會，但馬時亨太太王培琪就爆料，話因為睇書嘅問題同大女鬧大交喎。
遷就性格興趣 培育成材
話說喺馬露明五、六歲嘅時候，王培琪買咗本人人都話好嘅書畀大女睇，點知大女點都唔肯睇，為咗呢樣嘢就嗌交嘞，後來佢發現個女鍾意芭蕾舞，於是就買咗本有關芭蕾舞嘅書，大女就好有興趣攞嚟睇，而細女鍾意動物，佢都係用呢個方法吸引細女睇書。
馬時亨就變身G4，全場（目及）實三個外孫，仲話因為咁，自己瘦咗係有原因嘅。期間，大孫話要一個耳筒，呢個廿四孝公公即刻畀錢買。佢仲爆料話大女冇畫畫嘅天分，繪本唔係大女畫嘅。
馬露明亦自認畫畫好差，所以今次嘅繪本係搵位大學生幫佢畫，而呢位大學生嘅細佬妹係佢教育中心嘅首批學生，所以就相熟，佢話繪本令小朋友較易明白內容，又透露稍後將會再推出相關繪本。佢老公劉仲恒話馬露明做手工好啲，經常同囝囝一齊做摺紙或拼貼之類嘅小手工。
卓妮