政情：公民講場：陳肇始禁設乾貨檔 分分鐘得不償失

本港社會近來亂糟糟，唔止影響經濟民生，連唔少活動都受影響，仲要唔知呢個亂局幾時先平息。食物及衞生局局長陳肇始掌管嘅食物環境衞生署日前就宣布，明年一月嘅年宵市場不設乾貨攤位，聲稱以往年宵市場人多擠迫，新安排係考慮到目前社會情況，同保障檔主同市民安全。說到底，都係怕人多出亂子，最終演變成示威騷亂。不過你有張良計，網民自有過牆梯，有網民就自發搞年宵，仲話要杯葛政府年宵，減少庫房收入。陳今次諗住斬腳趾避沙蟲，係咪真係避到都未知，分分鐘仲得不償失添。