政情：政府止暴無能 授勳鬼祟閉門舉行
本港呢五個月來，因為政府修訂《逃犯條例》而引發示威及暴力衝突四起，社會立立亂，政府又止暴制亂無方，搞到唔少活動都要取消，唔止早前賽馬活動被迫暫停，十‧一煙花要取消，依家就連一年一度、政府視為重要活動之一嘅勳銜頒授典禮都好似驚咗班示威者搗亂咁，要改為鬼鬼祟祟咁閉門舉行，認真肉酸又羞家。
行政署尋日下午發出新聞公告，話二○一九年度勳銜頒授典禮今日就會喺香港禮賓府宴會廳舉行，不過鑑於近日嘅社會氣氛，典禮就會以閉門形式進行喇。至於政府授勳予受勳人士嘅錄影片段同圖片，就會透過政府新聞處發放咁話。
怕咗示威者 多項活動停辦
修例風波已經持續咗五個月，但係呢個政府就對止暴制亂束手無策，幾乎日日都有示威，真係「催煙」四起，民間呢幾個月來已經有唔少活動要停辦，依家連授勳典禮都要鬼祟閉門進行，偷偷摸摸咁，真係拎到勳銜都唔光彩啦！