政情：建制又甩轆 泛民臨時動議獲處理
立法會財務委員會議員不時唇槍舌劍，一向言論惹火嘅財委會主席陳健波（波哥）尋日又成罵戰主角。話說會上一班建制派議員疑似「甩轆」，喺建制派唔齊人情況下，由民主派所提出嘅臨時動議意外地獲得處理。唔知係咪咁而令波哥分外心急，變得勞嘈呢？
建制派喺議會人數一直佔多數，所以民主派喺會上提出嘅臨時動議如果未獲跨黨派共識，可以話係難以通過。點知尋日會上，建制派人數不足，意外地以三票之差通過同意去處理由民主派所提出嘅臨時動議，在場唔少建制派議員都一臉愕然。
陳健波再與議員罵戰
議員其後就是否支持有關臨時動議而發言。民主派議員譚文豪（Jeremy）就叫波哥咪咁心急，認為議案可以喺完會前完成審議。但波哥隨即反駁指議案好急，搞到Jeremy唔耐煩，指波哥霸佔咗佢嘅發言時間，直指︰「搭咩嗲啫！」又批評波哥浪費會議時間來嗌交，質疑建制派喺立法會大會上都拉布。唔知波哥係咪唔想再糾纏，最後宣布會議暫停十分鐘。而有關臨時動議最終都被否決。