中環出更：五音可治病 楊陳惠敏：傳統中醫療法應保留
中醫藥源遠流長，至今仍有唔少人會選擇中醫治療疾病同調理身體。仁愛堂行政總裁楊陳惠敏亦係仁愛堂中醫醫院籌備小組項目總監，負責競投本港首間中醫醫院嘅營運權，佢就話，傳統中醫有「五音療疾」嘅理論，認為未來嘅中醫醫院應保留傳統中醫療法，避免傳統中醫精髓失傳咁話。
楊陳惠敏日前喺一個有關中醫醫院發展嘅活動上話，傳統中醫有「五音療疾」嘅理論，對應五行嘅宮商角徵羽五音，調搭得宜有助通經絡、養臟腑。不過隨着中醫趨向簡化，五音療疾已淡出。佢就希望未來嘅中醫醫院保留傳統中醫療法，以避免傳統中醫精髓步向式微，甚至失傳。不過佢都提到此舉屬首創，營運上難免仍要以西醫為參考對象，望中醫中藥界同持份者多啲提出意見，集思廣益，構思可行嘅營運方案。
梁榮能：須設中醫院助臨床科研
同場仲有嶺南大學亞太老年學研究中心臨床實驗教授梁榮能、香港中西醫結合醫學研究所助理教授黃韻婷、澳門科大醫院護理總監李玉蓮，同廣州中醫藥大學客座教授黃傑。梁話，現時本港三所開辦中醫課程嘅大學學生多數都要到內地臨床實習，教授唔容易掌握實習成效，而本港嘅中醫診所就因病人流動性大，無法進行實證為本嘅臨床科研，所以必須要有一所中醫醫院，業界嘅發展至可以更上一層樓。
陳嘉龍：望中西結合 減運動傷患
曾為港隊三項鐵人運動員嘅香港大學中醫學學生陳嘉龍曾經喺運動期間扭傷，睇西醫久醫不愈，後來轉睇中醫就有改善，仲因而啟發咗佢去鑽研傳統中醫療法，望結合西方運動醫學，為運動員解決傷患困擾。陳話，有時候中醫治療更勝西醫，如運動員一旦染上傷風感冒，採取中醫療法嘅話，通常都可免除服用西醫藥物令人昏昏欲睡嘅副作用，咁就可以減少對日常訓練嘅影響喎。
卓妮