政情：防暴警唔認得馬逢國 立會外攔截
有網民呼籲尋日下晝一點到添馬公園聚集，警方隨即封鎖添馬公園嘅範圍同埋通往立法會大樓嘅海富天橋，期間立法會體育、演藝、文化及出版界議員馬逢國喺下晝兩點十五分左右途經海富天橋，防暴警員唔認得佢，截住唔放行，及後一名總督察上前問發生乜嘢事，同時認到馬逢國，隨即放行，畀佢返立法會。
我哋問過馬逢國，佢話唔知有網民呼籲喺添馬公園聚集，由於要返立法會做嘢，點知行經海富天橋就被警員截住，當時警員問佢有冇需要一定要返立法會，佢話要，所以就畀佢過。
馬逢國：冇可能認得每個議員
問到防暴警員係咪唔認得佢？佢就話冇可能個個議員都認得，呢啲好平常啫！再問佢禮拜日冇會開都返立法會？佢就話由於尋日有幾個活動要出席，兼且都係喺立法會附近舉行，所以佢咪返去立法會囉，佢又話好多時禮拜日都會返立法會做嘢o架喇！