中環出更：廖偉芬創咖啡王國 助農民改善生活
日前有一個頒發傑出女企業家獎項嘅活動，獲獎人士分享成功經驗，可謂巾幗不讓鬚眉，當中保良局總理廖偉芬（Jennifer）就因為自創嘅咖啡王國愈做愈大，成功奪得全場最大獎，佢話以往成日周圍走，最近覺得真係要留多啲喺香港，要多啲為年輕人、為社會服務，成為佢哋嘅榜樣，仲提醒女士唔好畀大眾標籤，女士都可以好出色咁話。
Jennifer話喺六歲首次接觸咖啡，當時逢星期日就會同爸爸有個小約會，就係去咖啡店飲咖啡，當時佢仲細只可以飲鮮奶，期間飲咗爸爸嘅一啖咖啡，仲覺得好苦，點知長大後竟然愛上，仲發展成事業。佢話每年都會親自向外國農民入咖啡豆，而且公司百分之七十咖啡都幫佢哋買，唔單止係靚豆，仲可幫助當地農民改善生活，實在係一件非常有意義嘅事。
金紫荊女企業家協會永遠榮譽會長丘璟珊（Carol）亦有攞獎，佢話做生意最困難嘅係中文，事關佢細個覺得唔需要學，點知大個要接管生意，就因為中文唔好遇到唔少困難，例如要喺電話群組傾生意，甚至返內地發展等。但佢就話好彩有媽咪做「幕後軍師」，逼佢朗讀武俠小說同上普通話班，中文先大有進步，Carol笑話依家睇劇唔使字幕都得喇！
戴凱倫接手生意 為父母分憂
卓妮又見到中華廠商聯合會名譽會長戴澤良同仁愛堂前主席羅台秦嘅女兒、現任總理戴凱倫（Karen），佢話放棄工作返去幫父母，開始時非常唔習慣，話父母要求較高，難免有少少壓力，但佢哋年紀愈嚟愈大，自己都有責任幫吓手咁話，如果有乜嘢問題都會用紙筆寫低同對方講添！Karen話主責工廈活化，加上最近政府推行過渡性房屋，希望未來喺呢方面都幫到手。
卓妮