政情:容海恩促立會設小組審視教材

最近有唔少家長投訴中小學嘅中文科、英文科同通識科教材,話相關教材立場偏頗,仲有老師喺課堂中散播政治觀點,中小學生缺乏判斷力,好容易受影響。立法會議員容海恩(Eunice)早前去信教育事務委員會主席葉劉淑儀,要求成立幼稚園、中、小學教科書及教材編製相關事宜小組委員會,目的係審視現有機制,紓緩家長嘅擔憂。

稱插圖具引導性 欠持平

我哋問過Eunice點解建議成立呢個小組,佢話收到家長投訴,發現教材裏面嘅插圖係警察拎槍指住市民,年紀較細嘅學生冇咁好嘅判斷力,如果老師冇解釋,教材就會具有引導性,變得冇咁持平啦。佢話今次唔係針對通識科,話好多時候老師都會喺冇教材嘅情況下上堂,例如中英文作文堂都難以涉及政治議題嘅作文,作文題目未必兩邊都得揀,可能會定死咗。

有家長就希望議員可以幫手向政府反映,Eunice就話教育局同老師都需要負責。佢認為依家嘅教育制度缺乏系統性,需要監管同定時審視,仲希望政府幫手檢視係唔係教育支援不足導致冇教材喎。但佢話立法會議程排得好滿,有得「打尖」就梗係好啦,但今年就應該成立唔到啦,惟有排隊等消息啦!

第一手消息請下載on.cc東網iPhone/iPad/Android/Windows Phone Apps