政情：行山曾遇險 羅榮輝學精
香港有唔少行山好地方，就連外國都有介紹香港行山勝地，早前喺一個活動上見到有遠足網站創辦人羅榮輝同漁護署郊野公園主任李英銘，分享自己行山經歷。羅榮輝話行山經驗有十幾年，平時自己唔多鍾意行街買衫，放假冇乜地方去，有次朋友帶佢行山，行咗一次就上晒癮嘞！
佢話最難忘有一次喺大埔紅石門行山，因為當年冇乜經驗，出發前做資料搜集唔多，同朋友孭住背囊就行，佢形容當時地形好複雜，根本唔係一條行山路線，行吓行吓行咗去海邊，仲要突然水漲被困，佢形容當時水深及腰，電話又冇信號，佢哋惟有慢慢涉水而行，夜晚先搵到路行番出嚟，最尾都有驚無險。佢仲話經過呢次經歷後，依家行山都做足準備，一定要了解環境同天氣變化。
李英銘曾被狗圍
李英銘亦鍾意行山，原因係覺得大自然好舒服可以令佢放鬆，所以入咗漁護署工作，佢最深刻有一次，同朋友行山經過村屋畀狗圍，幾個人背貼背望住啲狗，期間有人提議踎低扮執石頭，但都唔係好成功，好彩最後有村民出嚟解圍，先冇畀狗咬咋！