政情：馬拉松落場 侯志強跑100公尺
鍾情跑步嘅港人愈嚟愈多，新界鄉議局亦緊隨呢股潮流，早前喺沙頭角公路同香園圍公路，舉辦首屆新界馬拉松。上水鄉事委員會主席侯志强大清早就去到賽事場地跑埋一份。今次活動有半馬、十公里同五公里等幾個唔同嘅賽事組別，咁侯志强跑邊個距離呢？佢就話跑一百。跟住侯志强又補充，唔係公里，而係公尺。唔係呀？
佢解釋，跑幾遠唔重要，志在參與先至係重點，畢竟今次係鄉議局首次舉辦嘅跑步活動，自己身為鄉議局一員，當然唔可以缺席咁話。而佢就好高興目睹賽事嘅各個組別，都有數以千計嘅健兒踴躍參與，反映市民大眾都喜愛嘅體育康樂活動，值得鄉議局繼續舉辦。
稱辦活動前知會警方無可厚非
對於近日有長跑會表示，組織跑步活動前要先徵得警方發出不反對通知書，侯志强就話鄉議局籌備今次活動前，亦有通知多個政府部門。佢話以維持秩序同保障參與者安全嘅角度，組織大型活動前知會警方都係無可厚非。