政情：三輪紓困都冇份 張華峰轟遺忘金融服務界
反修例嘅激烈衝突持續近五個月仍未停，打殘咗香港經濟，立法會金融服務界議員張華峰（肥老闆）直指該業界都係重災區，但政府先後推出三輪紓困措施都冇惠及業界，批評政府完全遺忘咗整個業界嘅苦困。
立法會近日討論稅務寬免嘅條例草案，肥老闆都驚被遺忘，尋日喺Facebook再上載咗佢嘅發言，佢話受修例風波持續影響嘅行業，絕對唔止大家所見嘅第一線行業，好似旅遊、零售同運輸等，從事金融服務行業其實都係一個重災區，而且絕大部分都冇受惠於稅務寬免條例。
只係要求減牌費
點解？佢話金融服務業嘅中小券商，大部分都冇盈利，當然唔使交稅，而財政司司長將退稅百分比，以至實際退稅金額調升到去一個水平，同中小券商都係毫無關係，亦都幫唔到佢哋。
肥老闆話業界嘅要求好簡單，只係要求減免吓牌費，同減輕吓佢哋喺應付港交所交易系統不斷提升嘅沉重開支，但政府推出嘅紓困措施都冇業界份，佢仲提醒大家唔好唔記得，金融服務業對香港嘅經濟有好大嘅貢獻，佔咗本地生產總值近百分之十九，聘用嘅人員亦有幾萬人o架！政府收到未呀？