政情：建制拉布漫遊火星 梁君彥助攻提早休會

話說建制派議員依兩星期不停喺立法會拉布，大部分人喺呢兩日嘅全體委員會上仲發言兩次添！個個都咁多嘢講，少不免都有離題嘅情況，唔少人喺尋日嘅會議上都被立法會主席梁君彥截停話離題。

高佬賢扯到去人造衞星

雖然被指離題，但建制派一於少理，繼續講自己想講嘅嘢。高佬賢發言時就話同大家講個古仔，話美國太空總署同修女書信來往，內容大概就係去火星整個人造衞星，監察地球農作物嘅生長，令生產力增加，變相支援貧窮兒童。雖然唔知同稅務有乜嘢關係，但佢就話同香港情況一樣，每一個項目都係要做大經濟呢個「餅」，經濟好咗企業就可以繼續發展，仲拉埋黨友張國鈞（Horace）落水，話佢會幫手跟進。

Horace其後又真係發言跟進喎，不過佢就話高佬賢帶咗大家上火星，希望可以幫佢從火星帶返嚟地球，等大家可以繼續討論修正案。佢話用咗地球嘅角度講修正案，而唔係用火星嘅角度，所以係理性分析，莫非暗指何俊賢講嘢唔夠理性？

尋日難得有泛民發言，人民力量陳志全就話香港病緊，政府冇對症下藥，反而對病症不聞不問，依家嘅策略只係「止痛退燒」暫緩痛楚。聽落都同發言內容有關，點知佢講到一半就畀梁君彥話離題，佢就反駁「何俊賢講到去火星，我邊算離題呀？」

泛民改歌詞 諷「肺腑之言」

以為咁就完？民主派區諾軒喺會議結束前就二次創作，改歌詞話班建制派「創作力量同幻想，會嚇我一跳」、「咁多肺腑之言」，話依啲稅務寬免嘅嘢咁簡單，都要花四日時間去講同拉布，仲叫佢哋以後唔好再批評民主派議員拉布，同埋建議梁君彥加開會議，加到夜晚十一點，等大家暢所欲言，快啲審完議案。

因為內務委員會未選到正副主席，冇人頂梁君彥更，於是大會設有小休，但梁君彥尋日就話因為交通問題而提早喺晚上六點休會。到底事實係交通問題，抑或係幫建制派拉布呢？咁就不得而知喇！