中環出更：消防二哥叫暴徒「曱甴」議員震驚
消防處嘅工作本來係救火，點知今次就惹火，話說二哥梁偉雄本周二喺一個內部講座中，用「曱甴」嚟稱呼反修例示威嘅暴徒，仲話班曱甴會影響同事做嘢，又提醒同事出街要小心，「因為你影佢哋（曱甴），佢哋會打你。」
梁嘅言論一出，立即惹來前線人員反感，擔心會影響消防人員嘅形象。立法會議員林卓廷亦話，對梁發表仇恨言論表示震驚同不安，認為消防處嘅宗旨係救急扶危，拯救生命，但高層卻將示威者非人化，當佢哋係昆蟲，質疑係咪呼籲班手足唔好去救示威者。
斥影衰盡忠職守人員
林卓廷指梁嘅言論影響消防良好公眾形象，影衰盡忠職守嘅消防同救護員，已去信公務員事務局局長羅智光，副本就畀咗消防處處長，要求對梁作紀律調查，仲要將調查結果向公眾交代。
消防處表示，副處長梁偉雄上月二十九日到消防及救護學院，與同事進行座談，期間談及近日社會的聚眾事件中，有部分人的違法行為，嚴重破壞法治同社會安寧，惟該座談會為部門內部嘅意見交流活動，內容並唔對外公開。消防處稱，梁確認佢曾用「曱甴」嚟形容「這些罔顧法紀的暴徒」，但強調只針對暴徒而非示威者。
卓妮