中環出更：工業優勢不復再 鮑潔鈞：須建品牌具創意
時移勢易，香港出口商會會長鮑潔鈞話由上世紀八十年代開始，香港工業界背靠內地，得以順風順水咁享受長達四分一世紀嘅黃金歲月，但隨着內地亦逐漸掌握生產技術同資本累積，香港工業界所面對嘅競爭對手只會愈嚟愈多。換言之，舊時嘅優勢不復存在。
鮑潔鈞日前出席一個座談會時，呼籲工業設計師踴躍參加「香港智營大賞」，佢話無論今日有無中美貿易戰，若果繼續沿用代工生產嘅舊有經營模式，薄得似有若無嘅利潤，企業肯定會撐得非常辛苦，因此工業界必須建立品牌同埋生產具創意嘅產品。由於香港工業界喺過去嘅代工生產年代，積累咗唔少經驗同知識，好多企業都有條件去踏出轉型嘅步伐，但佢話肩負企業舊有生意嘅同事，未必勝任建立品牌嘅任務，所以最好係另組團隊，針對唔同嘅市場去開發迎合當地文化嘅產品。
梁振輝：設計要睇地區口味
香港出口商會副會長馬偉雄、玩具廠商會前會長譚裕民同香港智營設計大賞總監李綺文都有出席座談會。講起唔同嘅市場，香港工業設計師協會主席梁振輝就話工業界要食「四方飯」，產品設計要留意唔同地區嘅市場口味。佢話歐洲人同美國人，對顏色、商標、尺寸同位置嘅要求都有好大分別，而日本人又特別着重產品嘅細節，設計師想了解各地消費文化，唔單止要上網搵資料，觀摩外國嘅展覽會，亦係一個唔錯嘅方法。佢又話工業設計講求創新意念，亦要顧及成本同宜於量產，所以一件成功嘅產品，其實係研發、銷售同設計幾方面合作嘅成果。
卓錦清：網購業務講究美工
產品推出市場，就要有靈敏嘅銷售策略，而快將來臨嘅「光棍節」，就係購物消費嘅大日子。網購平台前業務發展總監卓錦清就講到，要令消費者喺細小嘅手機屏幕上留意自己嘅產品，要訣就係引人注目嘅圖像效果，所以網購業務要脫穎而出，美工就佔有一個好重要嘅位置，而同場嘅家居設計師鄭嘉鵬亦同意其見解。
卓妮