政情：公民講場：程鼎一加入旅發局 彭耀佳盼幫手救火

香港近來立立亂，嚇怕遊客，外地遊客唔敢嚟香港旅行，香港人又冇心情出去玩，旅遊業界生意真係插晒水，而政府推出嘅所謂救亡政策都被業界同一班立法會議員批評係小恩小惠、治標不治本，有議員仲預計過埋春節，旅行社會出現裁員潮同倒閉潮添。香港旅遊發展局主席彭耀佳尋日就宣布委任程鼎一為新一任嘅總幹事，程將於下月一日履新。彭仲話，好高興程喺旅遊業艱難時期加盟旅發局，期望程帶領團隊應對挑戰咁話。程係咪可以為處於水深火熱當中嘅旅遊業界救火，就要睇佢有幾多斤両喇。