政情：「數碼個人身份」改名iAM Smart遭議員笑爆

正所謂「唔怕生壞命，最怕改錯名」，政府近年着力搞「數碼個人身份（eID）」，點知最近就將eID改名，中文名叫「智方便」，而英文名就叫「iAM Smart」，聽落都幾騎呢。點解咁講？試諗吓日後被問到用咩方式交稅時，回答︰「iAM Smart」，會幾咁搞笑呢。

話說尋日立法會一個委員會上，創新及科技局局長楊偉雄講起數碼個人身份時就話，為免將「數碼個人身份」同智能身份證混淆，所以就將「數碼個人身份」改名叫「智方便」同「iAM Smart」。楊說罷，在座議員即刻竊笑，亦有人竊竊私語，連資訊科技界議員莫乃光都忍唔住問個名係點嚟，用呢個名做品牌係咪真係咁好。

唔講唔知，原來「iAM Smart」呢個名係來自「internet Access by Mobile in a Smart way」。政府資訊科技總監林偉喬會後話，中、英文名都係資科辦嘅同事諗嘅，仲係喺逾十個名中選出，討論咗兩三個禮拜先決定，而中、英文名都會註冊商標咁話。