政情：硬食反修例風波惡果 李慧琼評分創新低

調查由香港民意研究所於本月廿一至廿三日進行，成功訪問五百二十六人，受訪者喺未經提示下講出最多十名最熟悉嘅議員，結果首六位就包括李慧琼、陳淑莊等，雖然李嘅認知率達八成七，之不過李嘅評分就只得廿五點三分，排喺六名獲評分議員尾二。

政治方面冇突出表現

事實上，李嘅評分大插水事出必有因，有政界中人估計李喺政治方面已冇乜突出表現，而李統領嘅民記與民望低落嘅政府關係密切，該黨有問責局長，亦有多名副局長及局長政治助理，被視為特首決策核心嘅行政會議都有兩名成員在內。

政府施政「堅離地」懶理民情，一場修例風波竟然都可以燃燒將近五個月，仲要係毫無頭緒點樣先可以令到社會回復番平靜，李慧琼都無可避免係要硬食「有辱無榮」嘅惡果喇。