政情：人力委員會幾乎冇人發言 何啟明極速當選主席
立法會人力事務委員會原本於上次會議（17日）要選出新任正、副主席，點知建制派同民主派鬧交鬧全程，結果尋日就要召開特別會議繼續處理正、副主席選舉事宜。不過尋日會議竟然冇議員發言咁滯，仲極速選完正、副主席，由開會到散會都唔使十分鐘。勞工界立法會議員何啟明仲喺冇競爭下冷手執個熱煎堆，自動當選主席添。
零競爭下自動出任
話說上次會議，何啟明同社會福利界議員邵家臻都競逐主席，但尋日主持主席選舉嘅議員梁耀忠話，根據立法會《議事規則》，議員唔可以同時擔任兩個委員會嘅主席或副主席，邵早前已當選福利事務委員會副主席，所以唔能夠被提名，主席候選人變相得番何，最後何就自動當選喇。
何當選之後就食住個勢，快快趣趣選埋副主席，議員尹兆堅就提名都係民主派嘅議員朱凱廸，朱亦喺冇競爭下自動當選。會議之後仲確定埋下月八日舉行施政報告政策簡報會。唔知大家係咪太攰，全程都冇人發言，唔使十分鐘就散會喇。