中環出更：催淚煙波及果欄 陳肇始：擔心就唔好食
眨吓眼本港嘅示威同暴力衝突已持續咗四個幾月，幾乎每個周六、日都催淚煙處處，唔少市民都擔心催淚煙嘅殘留物質會對身體有害，近日連油麻地果欄附近都有催淚彈「放題」。尋日立法會開會，多名議員都擔心啲催淚煙飄入果欄會污染啲水果，於是追問食物及衞生局局長陳肇始點算好。點知陳就只係建議用清水洗吓啲水果，結果被炮轟「離地」，有議員仲話要請佢食催淚煙水果添！
話用水沖吓冇事 被轟離地
尋日喺立法會食物安全及環境衞生事務委員會會議上，多名議員提及油尖旺係示威黑點，警方都喺油麻地果欄附近多次施放催淚彈，擔心催淚煙飄入果欄會污染水果，所以就問陳肇始有冇要求食物安全中心抽驗市面出售嘅水果，睇吓有冇催淚煙殘留物質。點知陳就話，催淚煙嘅殘留物質同一般污染物屬同一類別，用水沖吓啲水果就冇事，仲話如果依然擔心就唔好食。
聽到陳咁講，一眾議員即刻鬧爆陳「離地」，反問陳「有冇搞錯？」。社會福利界議員邵家臻就話，周日果欄有催淚彈「放題」，佢周一就喺果欄買咗四個韓國風水梨，食剩三個，想送一個畀陳食。唔知陳又夠唔夠膽接受呢份禮物呢﹖
卓妮