中環出更：特殊學生具潛力 周靄儀冀社會了解
社會競爭激烈，如能力不足，好易就成為邊緣社群。香港特區中央獅子會會長周靄儀（Daisy）尋日出席一個活動時話，之前同會友參觀特殊學校，發現校內特殊學生嘅能力比想像中高，不過就算佢哋同一般人嘅表現相若，畢業後嘅就業率都唔理想，所以都希望可以舉辦活動促進大眾對特殊學生嘅了解。佢仲話，如果呢啲學生止步於職場，就浪費咗社會所投放嘅教育資源喇。
嘆就業率唔理想
Daisy又話，佢同會友構思咗一個選舉活動，打算邀請全港十七間特殊學校，提名十四至廿一歲嘅學生去競逐傑出關愛學生殊榮，以鼓勵輕度智障人士積極自强，同促進大眾對特殊學生嘅了解。佢又話，輕度智障人士亦有其潛力同理想，願意貢獻所長以證明自己並非社會包袱，不過好可惜嘅係佢哋探訪特殊學校時，校長都話佢哋嘅學生畢業後嘅就業率唔理想。
同場仲有該會第二副會長鄭淦元、獅子會姊妹學校計劃主席姚君偉、協康會區域經理莫惠霞、傑出關愛學生選舉大會主席許偉雄同副主席劉桂華。莫平時同特殊學校嘅畢業生有好多接觸，認為特殊學生同普通人一樣都有唔同志願，例如想成為餐廳老闆、畫家、足球員等，雖然佢哋受天資所限，要克服嘅困難非常多，但都好努力，佢就曾見過有特殊學生自知口齒不清，於是努力學習清晰咬字發音，亦有特殊學生嫌自己字迹欠佳，勤加練習書法，希望寫出有一手亮麗字迹嘅履歷表，直言佢哋對理想嘅堅持同追求令人動容。
姚君偉亦都話，雖然輕度智障人士語言交流嘅反應較慢，但勝在專注力强、忠誠度高，樂意擔任重複性高嘅工作，認為餐飲業、物流業及倉務管理等都有工作崗位可以由輕度智障人士任職咁話。
卓妮