政情：今日你上鏡：莫乃光攬實卿姐賀牛一

立法會議員莫乃光（Charles、右）日前生日，咁重要嘅日子，好多人都會同太太一齊慶祝，點知Facebook就出現咗一張佢一手攬住其他女人嘅相，另一隻手仲攞住成盆壽包，笑得勁開心，成件事幾咁明目張膽！其實呢個女人只係前立法會議員劉慧卿（卿姐、左）。卿姐喺回歸前嘅立法局年代，已經當選做議員，Charles就二○一二年才開始做議員，卿姐係Charles嘅大前輩，二人就梗係冇嘢啦，卿姐鞭策Charles就有份，卿姐仲喺貼文寫話祝好朋友Charles生日快樂添！