立法會人事編制小組委員會早前喺建制派蔣麗芸（Ann）提名下，議會陣線陳志全（慢必）自動當選做副主席，當時大家都好訝異，其後就有建制派話原本呢個位協調畀公民黨楊岳橋，暗批阿Ann以為自己咁樣係嬉笑怒罵，其實政治唔可以咁樣玩法。
不過，阿Ann事後就堅持話只知呢個位係畀泛民主派，根本唔知道係畀邊個泛民，楊岳橋其時亦冇出聲話要，亦有建制撐阿Ann，話批評阿Ann嘅人可能係自己不滿慢必先至會咁講。
件事依家變咗口同鼻拗，無論真相係點都好，總之慢必做人事編制小組副主席就係出乎大家意料之外，原來當日牽連埋工務小組委員會。話說，建制派原本就預計專業議政莫乃光做副主席，點知又突然有人提名議會陣線朱凱廸。
有建制懷疑議會陣線食過翻尋味，似乎想複製人事編制小組嘅結果，建制派見勢色唔對，即刻提名民建聯何俊賢做副主席，志在警告泛民唔好再玩嘢，否則就連少少權都收番。
雖然雙方其時未有直接溝通，但都明白發生緊咩事，民主派亦只好按協議行事，莫乃光就接受提名，最終當選做副主席。講真嗰句，其實建制派依家喺各委員會佔盡票數優勢，如果擺明唔理觀感，有權用盡，可以包攬晒所有委員會嘅正、副主席，但依家都願意放番啲位出嚟畀泛民，都係唔想搞到關係咁僵，但泛民搞埋呢啲小動作都唔知為乜，可能同爭取民主一樣唔肯認命啩。