政情：女性事業受限傳統 彭芷君嘆社會損失
唔少女性都要喺家庭同事業間掙扎，金紫荊女企業家協會永遠榮譽首席會長彭芷君（Gigi）早前講起，香港女性平均都有中學程度，甚至大學或者更高嘅學歷，佢哋喺社會嘅工作能力非常強，無奈一啲傳統觀念，認為女性結婚後要生BB，要留喺屋企湊仔，令到佢哋喺事業卻步，等同損失咗啲社會資源，真係好可惜！
Gigi認為，現今女性絕對有能力擔起半邊天，其實好多企業高層都係女性，佢最近考察東盟國家時，見到當地好多女性自覺身份低微，佢都會了解吓對方有乜困難。佢話，見到有啲地方女性刺繡好叻，就會鼓勵佢哋喺呢方面繼續努力，希望可以幫佢哋重拾信心，得到正面嘅人生觀。
平衡家庭與工作 唔係做唔到
講起點樣平衡家庭同事業，佢話喺屋企就要賢淑，出外工作要聰慧，開頭可能有少少困難，但磨合期過咗之後，其實都做得到嘅，好似佢自己工作會全情投入，返到屋企就會拋開手頭上一切嘅工作，又會陪老公同囝囝去打網球，完全冇問題咁話。