中環出更：高官無影 謝偉銓警告致謝議案少支持
立法會建築、測量、都市規劃及園境界議員謝偉銓（Tony），尋日出席活動時被問到喺嚟緊嘅施政報告致謝議案會否投贊成票，佢坦言話未認真諗，但就提到好多議員不滿政府管治班子表現，投訴啲官員成日都唔見人。佢話，即使有啲局長係負責民生經濟範疇，不談政治，但都要出嚟見人同解說政策，否則市民就會覺得啲局長唔知去咗邊。
Tony仲特別提到商務及經濟發展局，話最近咁多店舖都畀人毀壞，作為官員點都應該關注吓、問候吓受影響商戶，始終人哋都係合法經營嘛，所以佢估計建制派支持致謝議案嘅可能性較低。至於內務委員會仲未選出正、副主席，佢就話應該有排先得喇，仲笑說議員日前審議稅務條例時，都紛紛借題發揮，盡訴心中不滿！
料樓價唔會持續上升
講到政府推出「空置稅」，從事房地產業務數十年嘅Tony就話，本身樓價有向下趨勢，而新政策可以話有短暫刺激作用，樓價本身向下變番向上，但因為之前跌咗啲，數字上應該未明顯見到，但佢就話長遠嚟睇，幅度唔會持續上升喎。
卓妮