中環出更：李國興倡保育小區傳承集體回憶

以星洲牛車水作例

李國興尋日出席「共建活力築蹟」閉幕禮，佢話由中環原址拆卸、然後往赤柱現址重建嘅美利樓，可謂香港活化古蹟嘅代表作。然而作為建築師，看待舊建築除咗講求歷史價值，亦要考慮公眾嘅集體回憶、周邊環境以及社區氣氛，若條件許可的話，與舊建築相連嘅小區都一併保留就最理想。李指，新加坡嘅舊區「牛車水」，整片地域都盡量保留舊貌，令人置身其中，頓生回到過去之感，而成功嘅保育計劃，既承載城市昔日回憶，亦會令遊客注目咁話。

作為今次活動嘅合作夥伴，九龍樂善堂前主席施家殷話，因樂善堂計劃將閒置校舍改建為過渡性房屋，從而深切領略活化舊建築之困難，因為舊校舍每個班房都要增設供水同排污管道以符合衞生要求，其工程之艱巨，倒不如將舊建築拆卸重建，會來得更便捷，但為咗保留舊建築嘅歷史價值，付出較高嘅心血都在所不惜。

太平山青年商會行政幹事黃洪銓（右）同建築師馮詠之（左），為活化鯉魚門度假村嘅設計方案投入唔少心血。

梁以華（右）指中西融合係香港舊建築嘅特色。鄭信古（中）搜羅舊磚瓦為修葺舊建築作準備。圖左為香港建築師學會古蹟及文物保育委員會副主席何心怡。

出席閉幕禮嘅嘉賓，仲有磚頭修復工藝師鄭信古，佢話本港過去嘅嶺南建築，多以青磚為建材，然而華南一帶嘅青磚工廠近乎絕迹，所以每當有村莊舊屋拆卸，佢都會趁機搜羅舊磚瓦，為日後修葺古蹟準備材料。香港建築師學會古蹟及文物保育委員會主席梁以華話，雖然本港欠缺千年歷史嘅舊建築，又無富麗堂皇嘅宮殿，但舊日嘅本地工匠為完成英國人所指派嘅工程任務，會使用「雙筒雙瓦」嘅中式鋪瓦手法，應用於西式樓宇樑架之上；又或用英國紅磚，但砌磚方法就採用中式，本港舊建築體現中西融合嘅特色，世所罕見，實在值得好好保存。

卓妮