政情：收料站：內會主席仲未有 梁君彥設大會小休自救
立法會開會不嬲都係馬拉松會議，平時周三大會由朝早十一點開到夜晚八點，而周四嘅續會都由朝早九點開到夜晚八點，開足九個鐘同十一個鐘，仲要無特定休息同午飯時間，但主席梁君彥尋日竟然宣布今日召開嘅大會有小休同食飯時間。點解突然咁好？因為梁君彥要自救囉！
梁君彥尋日指示秘書處發文件通知議員，喺今日同聽日嘅大會將設小休同午膳時間。今日上晝無小休，午膳時間就定咗喺大約下晝一點半至兩點半，食完飯下晝大約四點九至五點三仲有多個小休。至於聽日嘅續會，午膳時間同下晝小休時間同今日一樣，但係上晝大約十一點至十一點半有多一個小休。
無人主持會議 直踩頂唔住
點解突設休息時間呢？我哋問咗秘書處，秘書處話係因為內務委員會到依家都未選到今個會期嘅正副主席，喺內會未完成選舉之前，立法會主席就要全程主持今個星期嘅立法會會議。原來係冇人頂梁君彥主持會議，直踩梗係頂唔順喇，再加上佢都要食飯同去廁所（口架），所以咪安排小休同午膳時間囉！