政情：玩埋行管會 陳健波志在補位
立法會新一個立法年度展開，可以話係立法會大內總管嘅立法會行政管理委員會亦要選出十名新委員。不過截至本周一，立法會秘書處就接到十一個提名，當中上年度並非行管會委員嘅財務委員會主席陳健波（波哥）竟然有份。唔通佢嫌主持財會唔夠忙，行管會都玩埋一份？
料馬逢國當選內會副主席
行管會主席由立法會主席同時兼任，按慣例立法會內務委員會正、副主席都係行管會委員，合共十三人。不過建制派同民主派今年爭得激烈，連內會正、副主席都未選出，而建制派更密謀由上年度係行管會委員嘅議員馬逢國出任新一任內副，踢走上年度任內副嘅民主派議員郭榮鏗。有消息指，波哥突然角逐行管會，其實係建制派打算馬逢國當選內副後，填補其原本行管會普通委員之位。
根據立法會文件，上年度嘅行管會委員譚文豪就不在今次行管會委員選舉候選名單之列，而其黨友郭榮鏗就喺角逐名單當中，似乎係為失落內副後繼續留喺行管會作準備。如根據呢個劇本，內會正、副主席由建制派包攬，波哥又順利當選行管會委員，行管會內建制派同民主派嘅比例就會由九比四變成十比三，建制派將進一步有壓倒性優勢喇。