政情：林健鋒慶生 張華峰送蛋糕玩神秘
因應近期嘅示威浪潮，唔少地方為咗避開政治漩渦寧願自設審查，蛋糕店都係其中一個有自我審查嘅地方，而立法會議員張華峰（肥老闆）尋日為黨友慶生準備生日蛋糕，仲話蛋糕牌寫咗四隻字，唔通係敏感詞？
寫「鋒平浪靜」 食字有意思
議員林健鋒尋日獲一大班黨友提早慶祝生日，講飲講食最叻嘅肥老闆就好有心咁預備生日蛋糕，而呢期嘅示威口號多數都以順口同入腦為主，唔少都係四隻字，所以當肥老闆話蛋糕牌寫咗四隻字時，立即惹人遐想囉。
肥老闆非常口密，直到要切蛋糕時先開估，就係大玩食字「鋒」平浪靜，啱晒近期嘅社會氣氛。林健鋒對於呢句祝福語都非常收貨，話現時感受到平淡同平安並唔簡單，大嘆平安是福，希望香港盡快平靜，做到風平浪靜，唔好再打打殺殺喎。