政情：九巴獎勵員工瘦身 減15磅有$1000
減肥都有錢收？講緊嘅並唔係美容纖體公司，而係九巴最近推出嘅瘦身獎勵計劃，只要喺三個月內減十五磅，即可獲得一千蚊現金！九巴回覆話，今次係首次推出計劃，希望員工注意體重咁話。
睇番宣傳單張入面嗰位車長嘅瘦身效果都幾驚人！據了解，呢位車長成日跑步，一共減咗五十磅。咁咪同一個小朋友嘅體重差唔多？講番個計劃先，參加嘅員工假如第一個月減到五磅，就會有二百蚊，第二個月再減五磅，就有三百蚊，第三個月再減多五磅，五百大元即時落袋。咁即係三個月減十五磅，就一共收到一千蚊嘞！
名額100個 下月中截止報名
計劃嘅名額有一百個，到下月十五日就會截止。減磅有錢收，聽落都幾吸引。九巴話，計劃推出咗兩日，暫時未知反應係點，而今個月係佢哋嘅「健康月」，仲搞咗一連串活動，例如穴位按摩、中醫服務同健康工作坊，又話平時喺九龍灣車廠都有跑步機畀車長運動，亦會組織興趣會，畀員工一齊打羽毛球同籃球等等。唔知三個月後，搭九巴嗰陣，會唔會多咗好多型男車長呢？