政情：立會發環保小貼士 教議員潔淨回收
近年社會都幾注重環保，但就唔係個個都知道回收嘅正確步驟係點，立法會秘書處尋日就發電郵提供咗啲環保小貼士畀議員，呼籲大家要為環保出一分力。其實秘書處間中都會出啲環保小貼士畀議員，例如建議將冷氣溫度保持係二十五點五度，而今次嘅小貼士就關於議員樓層茶水間內用嚟回收膠樽、紙張、金屬罐同玻璃樽嘅回收箱。
提醒拆書釘萬字夾招紙
小貼士問議員知唔知咩叫「潔淨回收三紙和膠樽」？三紙係指報紙雜誌、紙皮同辦公室用紙，提醒議員將三紙放入回收箱之前，記得要拆除釘書釘同萬字夾，撕走紙皮上嘅膠紙及有塑膠成分嘅封面、內頁同信封窗口。至於膠樽就包括飲品膠樽同個人護理用品嘅膠樽，將膠樽放落回收箱前，一定要緊記去除樽蓋，仲有搣埋招紙添。
講真嗰句，尊貴議員日理萬機，邊度得閒搞咁多環保嘢吖，睇嚟都係想叫議員叮囑旗下助理同事做好環保工作啫，唔好貪就手求其揼咗算數。