政府喺本月初決定引用《緊急情況規例條例》訂立《禁止蒙面規例》再惹爭議，而呢條附屬法例為「先訂立、後審議」方式，立法會將設小組委員會審議，加入委員會嘅期限今日凌晨屆滿，但限期前已有最少五十八人加入，聽聞議員黃定光（象哥）好大機會會做主席喎。
首次會議訂於下周二（22日）舉行，截至尋日中午已經有五十八人加入，對於審議附屬法例嘅小組委員會而言，情況已經好墟冚，亦都足以證明泛民同建制陣營都大晒冷，互相冧友加入小組，決心要爭長短。
建制派喺議會中佔多數，主席人選好大機會由建制派出任。據了解政府屬意象哥擔任主席，而象哥過去喺立法會中擔任唔少法案委員會主席，相信係呢個經驗而畀睇中喇，本身係建制一員嘅象哥，估計好大機會能夠擔正。至於副主席人選，聽聞建制派就未有定案，有指考慮到今次附屬法例有時限性，未必會設副主席喎。