中環出更：陳淑莊提「洋腸論」 遭何君堯鬧腦有病
立法會今個星期一復會就火花四濺，仲演變到人身攻擊添！話說議員陳淑莊尋日喺內務委員會（內會）會議上重提議員何君堯發表嘅「食洋腸」言論，但陳就話唔會重複呢三隻字，但何就反駁陳的指控唔清唔楚，何仲對住曾接受腦部手術嘅陳淑莊話：「你個腦有病」喎，話呢個係事實喎。何隨即被主席警告唔好侮辱其他議員，而陳就話多謝問候，強調好人一生平安咁話。
內會仍未選出正副主席
內會最終開咗三個鐘都仲未選到正、副主席，同日仲有政制事務委員會同一命運選唔到。至於教育事務委員會就一如所料，由議員葉劉淑儀擔任主席，而去年擔任主席嘅教育界議員葉建源就降格做副主席。
至於教育以外仲有八個事務委員會順利選出正、副主席，分別有福利、房屋、民政、經濟發展、保安、工商事務委員會都選到正、副主席，而交通事務委員會本身都選到正、副主席，但作為副主席嘅議員譚文豪，喺選舉後話開唔到部分會議而決定退選，所以下次會議將就副主席進行補選喇。
卓妮