政情：有相為證：立會發黃警 司局長出入都要安檢
原本特首尋日要喺立法會會議廳宣讀施政報告，但立法會大樓喺呢一兩日發出黃色警示，所有出入大樓嘅人都要接受安檢，就連一眾司局長都唔例外，尋日朝早就見到律政司司長鄭若驊、環境局局長黃錦星（圓圖）等人喺地下議員入口，排隊準備接受安檢，期間都好有秩序，等咗一陣就完成成個安檢程序。
副局政助行會成員無影
仲有一個奇怪嘅現象，就係過往發表施政報告，班副局長同被議員批評唔見影嘅政治助理，大部分都會嚟立法會旁聽，但尋日副局同政助都「無影」，就連按慣例會嚟旁聽嘅一眾行政會議成員，都係僅得兩名出席，當中包括咗行會召集人陳智思。唔通佢哋都覺得唔會噏得到施政報告，抑或係一早收到風開唔成會，所以費事嘥時間？咁就只有佢哋先知嘞！