政情：17次去北極採藻樣本 何建宗：工作永不止息

何建宗喺二十幾年前去北極「開荒」，研究極地藻類，而佢近日喺Facebook貼文，準確咁話已經有二十四年半嘞，強調會繼續採取樣本，因為要建立高緯度海區微藻多樣性數據庫，仲話為咗香港人嘅科研，自己會繼續做落去，唔會停低落嚟。

忘帶鬚刨 搞到樣似滄桑

香港呢排社會紛亂，人心不穩，佢都話呢次去北極，帶着憂念，仲唔記得帶鬚刨，話自己一把年紀，搞到個樣都有啲滄桑。

對極地藻類嘅研究，佢仍然孜孜不倦，就係因為氣候變化影響太大，而所有氣候變化現象都同海洋及極地有密切關係。佢曾經講過展開減少、緩解、預測同適應氣候變化嘅工作係刻不容緩嘅，而相關工作應建基於科學，同埋從深入而全面科研取得嘅數據，所以建立相關嘅數據庫係好重要，亦都係環境可持續發展嘅關鍵咁話。