政情：財會疏導大塞車 民生優先公僕加薪借歪

喺上個立法年度，立法會工務小組委員會交咗逾一千四百億元嘅項目畀財會審批，但財會只處理咗唔夠一半，當中不乏與民生相關嘅項目。而財會積落四十四項撥款項目過暑假，據聞政務司司長張建宗同財政司司長陳茂波曾經喺七月搵財會主席陳健波（波哥）同副主席陳振英商討點樣加快處理，但當時不歡而散，所以財會取消會議，過埋暑假先再算。

防惹爭議 令大樓再受重創

現時暑假已經到尾聲，財會明日就率先開會選出新一任嘅正、副主席，似乎開工清理車龍有望，不過當局如何安排議程都係一門學問，因為持續咗四個月嘅示威浪潮未見冷卻，更因為上星期政府宣布實施《禁止蒙面規例》而火上加油，如果一埋位就處理具爭議項目，分分鐘令到啱啱完成復修嘅立法會大樓再度重創，聽聞政府主力先推惠民政策，希望民生項目優先，面對嘅阻力都較細囉。

選主席過程料不會太順利

據了解，已過工務小組嘅民生項目會優先處理，即涉款一百六十億元嘅T2主幹路及茶果嶺隧道工程、廿四億元嘅橫洲公屋計劃工地基建、逾一百億元嘅葵涌醫院及威爾斯醫院等重建或擴建工程等，至於公務員撥款就唔會放得太前，以免畀人覺得公務員優先過民生。

其實早喺六月已經有泛民對公務員加薪項目有動作，當時希望暫緩實施警隊加薪，所以復會不久就處理呢個項目確有可能添煩添亂，難為公務員團隊要再等多陣先加人工，不過項目追溯到今年四月，公務員嘅人工唔會少收，只會遲收。

波哥就話，明日會議順利選出主席後，先會知道政府嘅議程安排，但佢話按現時氣氛，估計選主席過程唔會順利，但若然順利當選，佢就傾向盡快加會處理塞車項目，因為目前有涉及七百幾億元嘅項目，影響住三十幾萬名建造業從業員生計。