政情：公民講場：預告立會黃色警示 梁君彥未開會驚定先

立法會大樓七月一日受到示威者衝擊同破壞，大樓內多處嚴重受損，經過三個多月嘅趕工復修後，預計下周三可以復會，而政府亦會於復會當日發表新一份施政報告。立法會主席梁君彥尋日就交代立法會情況，仲提到為咗確保會議可以順利舉行，立法會行政管理委員會決定喺下周三同下周四一連兩日發出黃色警示。翻查資料，立法會一旦發出黃色警示，立法會會議就最多只有五名公眾人士旁聽，議員嘅職員唔可以進入大樓一至三樓，包括會議廳所屬樓層，大樓亦都暫停接待議員訪客。俗語有話「未出發，先興奮」，不過梁君彥就係「未開會，驚定先」喇。